الصنجان

شارك هذه المقالة مع أصدقائك!

مشاهدات : 69 views

ديوان alshargi.us diwan

يحكى انه كان هناك في قديم الزمان أسرة مكونه من الأب والأم والبنت والجدة وكلهم كانوا صنج ( صم ) كان الاب فلاحآ يشتغل في حراثة الارض ,وكان معه ثورين وبعض من الاغنام وبيوم من الايام كان مشغوووول بحراثة الحول ,جزع واحد من الرعيه حق القريه والقى عليه التحية :السلام عليكم. جاوبه الفلاح :ماشابيعيش اثواري, قاله الرعوي من قلك اننا ششتري اثوارك ,انا الا قلت شاسلم عليك
قاله الفلاح اقلك ماشابيعش لاالاثوار ولاالغنم حقي قم اجزع اذي الساع من جمبي خيرة الله عليك وخلينا اكمل بقية المهره. كمل الفلاح شغله بحراثة الارض وروح لبيته وقت الظهر …اجاء قامرته جهزت لهم الغداء وكان غداهم نشووووف.

قام يحكي لمرته ايش الي حصل معه ومع الرعوي ,قاله يامره اجي مو شقلك كما اليوم وانا جالس احرث الحول جزع لعندي واحد رعوي وقال نعم يشتينا ابيعله واحد من الاثوار او الغنم لكن انا مرضيتوش قلتو اله ماشابيعش لا الاثوار والاالغنم ,ردت عليه مرته وقالته واني مو دخلني تصيح فوقي لو النشوف فاسخ اذي الابنتك الي قامت تعصد اليوم هيا راعي شسرح اتمطر به وارجع لك.

قامت المره وسرحت تصيح فوق بنته قالته الله يقصف عمرك ويعجل بعجلك ابوك قااقام يتمطر بي نعم لمو اكا العصيد فاسخ اليوم قلتوا له اذي بنتك عصدة اليوم مش اني ,جاوبته البنت قالتله شوركم يااما الي تشوفوه لصالحي اعملوه اني راضي بحكمكم انتي وابي اذا كان العريس مناسب لي اني بعدكم شوري من شوركم .

طبعآ اعتقدت البنت ان امه تكلمه على عريس اجاء يخطبه ,سرحت شتفرح جدتة انه اخيرآ اجاء له عريس وتشتي تسمع رائ جدته بالموضوع ؟قالتله جدته والله يابنت ابني اني من جيزكم بالغداء ان شتندولي نشوف اكلت معاكم وان شتغدوني اعواس من حق الصبح ماشاقلش حاجه

‫0 تعليق

اترك تعليقاً