قصة مولاي الرأس

شارك هذه المقالة مع أصدقائك!

مشاهدات : 288 views

alshargi.us diwan ديوان

سلام الله عليكم يا أصدقائي الكرام قصتنا قصة من التراث المغربي الاصيل، إوا يا سيدي ميحلى الكلام إلا بالصلاة  وسلام على النبي محمد، ونبداو قصتنا كان يا مكان حتى كان الله في كل مكان، حتى كان الحبق ورمان في حجر النبي العدنان، وكان يا مكان واحد البنت عطاها الله من زين ما شاء الله، كانت سميتها وردية و لي شافها يتفتن بجمالها، واحد النهار شفها أمير من جن ولد ملك الجن عجباتو بزاف او تمنى يتزوج بيها لكن هو كان من الجن او هي من الإنس، فكر الأمير و قرر أنه يتسيف بصفة إنسان و يجي يخطبها.

او داكشي لي كان في رمشة عين و بقدرة القادر الرحمان تحول هذ الجن لصفة إنس و مشا يخطب وردية من عند وليديها، ودا معاه الهداية من الانواع و الاشكال الفاخرة، وصل الباب الدار او دق، حلو ليه مالين الدار أش كاين ما كاين قال ليهم جيت طاب راغب في يد بنتكم وردية، إوا لي جا و جاب يستاهل ترحيب الحباب، دخلوه او رحبو بيه كما ينبغي او قالو ليه الشوار شوار بنتنا إلى وافقت عليك الله يكمل بالخير او سولو وردية او وافقات، ولكن قالو ليه راه عندنا واحد شرط، المرة جاية جيب معاك والديك كيف العادات والتقاليد او وافق.

مشا الأمير عند باه الملك الجن او قال ليه راني بغيت نتزوج بنت من الإنس واش تجي معايا نخطبها، باه وافق عن طيب خاطر، او مشاو خطبوها المرة التانية او تافقو على نهار العرس، جا نهار العرس الامير صيفط الخدم و الحشم ديالو بي الهدايا الفاخرة لكن لا هو لا عائلتو حضرو العرس، كلشي جاتو غريبة لكن كملو العرس عادي، ملي كمل العرس او كلشي مشا الدارو، وردية مشات البيتها او جا واحد من خدم الأمير حط قفة في داخل ديالها راس ديال بنادم حدا باب ديال بيت وردية او مشا، و حد شوية تسيف هذاك الرأس ورجع بصورة امير الجن او دخل عند وردية مفهمت والو، مهم دوز معاها ليل كامل، او هذشي ولا كيتعاود كل نهار، ديما ملي كيمشي من عند وردية كيخلي ليها بزاف ديال هدايا.

واحد النهار خوت وردية مشا عندها سولوها كيفاش راجلك كيجي غير بليل هي معرفتش تجوبهم حيت اصلا معرفتش سبب، قررو يراقبوه بلا ميقولوها ليها، و داكشي لي كان في ليل جا الخادم حط القفة في الباب كيف ديما او مشا شوية بان ليهم قفة بدا يخرج منها الدخان او مبقاو كيشوفو والو خرج الامير دخل عند مراتو، او ملي حيد دخان او رجعو كيشوفو مشاو يقلبو القفة ملقاو فيها والو قررو يعمروها بي الملح.

في صباح فاق الأمير ولقا القفة ديالو عامرة ملح، رجع عند مرتو او قال ليها من اليوم نتي حرام عليا، بدات كتبكي قالت لو علاش قال ليها بيت رجع القفة او لقيتها عامرة ملح، وردية مفهمت والو او قالت ليه انا أشنو ذنبي، قال ليها ماشي شغلي انا غادي فحالي او الى بغيتيني نرجع ليك خاصك تخدمي سبع أيام عند مرأة عمياء و سبع أيام عند مرأة عرجاء او سبع أيام عند مرأة فيها جدام او من بعد غادي تجي الدار ديالي او دق عليا سبع أيام متابعة او ديك ساعة رجع ليك، او غير كمل كلامو غبر او مبقاش ليه الأثر.

وردية مفهمت والوا في كلامو ولكن ولات كتبغي راجلها بزاف، قررت انها تمشي تقلب عليه جمعت حويجها او خرجات كتقلب من بلاصة البلاصة ولكن والو واش لقاتو، عيات وجلست فوق واحد الحجرة او جا واحد رجل كبير او حكيم شافها مهمومة او سولها، حكاتليه قصتها او قال ليها هدشي لي قال ساهل ماشي لغز صعيب، غادي غير طبقيه او صافي او نعت ليها دار واحد المرأة عمياء باش تمشي تخدم عندها.

مشات وردية عند المرأة دقت عليها او ملي حلات الباب سولت وردية أش بغات، قالت ليها أنا وردية بنية مرضية او جيت باش نخدمك سبع أيام بلا فلوس ولا هدية، ملي سمعتها المرأة قالت ليها تفضلي ابنتي حتى انا خاصني لي تعاوني، و داكشي لي كان، وردية خدمة عند مرأة سبع أيام تعاونها في شقا او تجمع ليها او طيب ليها، او ملي سلات سبع أيام قالت وردية المرأة انا صافي ساليت او غادي نمشي فحالي مزال تبعاني طريق طويلة، المرأة عزات عليها وردية قالت ليها بلاتي نهديك هدية وردية مبغاتش ولكن مرأة حلفات عليها او وافقات عطتها واحد طاصة خداتها او مشات فحالها.

وردية في طريقها قابلات واحد مرأة عرجاء او هي تمشي عندها او قالت ليها أنا وردية بنية مرضية او جيت عندك باش نخدمك سبع أيام بلا فلوس ولا هدية، وفقات مرأة على عرض وردية حيت هي خاص لي يعاونها، خدمات وردية عند هذ المرأة سبع أيام و حيت وردية بنت ضريفة و طيبة او كتدخل الخاطر دغيا عزات على هذ المرأة حتى هي، او ملي سلات سبع ايام وردية جمعت حويجها او بغات تمشي فحالها، او هي تقول ليها المرأة بغيت نهديك هدية وردية رفضات ولكن المرأة لحات عليها بزاف، او وافقات او عطاتها واحد المشطة ديال ذهب، خداتها وردية ودعات المرأة و كملات طريقها تكمل لي بدات.

وردية او هي غادية سولات على مرأة فيها جدام نعتو ليها الناس في تلقاها او ملي وصلات عندها كلشي جيرانها قالو ليها متمشيش عندها راه غادي تعاديك حيث هو مرض معدي، وردية متسوقاتش ليهم او دقات على المرأة او قالت ليها أنا وردية بنية مرضية او جيت نخدمك سبع أيام  بلا فلوس ولا هدية، وافقات المراة او دخلاتها الدارها، وردية كيف العادة تهلات في المرأة او عاوناتها او طيبات ليها او جمعت او صبنات ليها حتى سلات سبع أيام، جمعت وردية حويجها او بغات تمشي فحالها، وقفاتها المرأة او قالت ليها بنتي دخلتي ليا الخاطري بزاف او بغيت نهديك هدية، وردية رفضات ولكن مرأة لحات عليها او وفقات، المرأة عطات الوردية فروج ديال ذهب او معاه ملادو صغار في نقرة، خداتهم وردية وخرجات.

كملات وردية طريقها او هي كتقلب على دار رجلها او كتسول، حتى وصلت الواحد القبيلة، او بان ليها واحد الراجل بحال راجلها تبعتو شافتو دخل الواحد الدار، سولات عليه قالو ليها الناس راه ساكن فيها هذ الراجل او كيبان ليهم غير في ليل جاي داخل لدارو، هنا عرفاتو بلي هو راجلها وقررات دق في الباب محل ليها حد او بقات كدق او والو، رجعت النهار لاخر دق بزاف او حتى حد محل ليها الباب، بقات وردية على هذ الحال المدة سبع أيام، او في النهار الثامن دقات او هي تحل ليها واحد المرأة كبيرة في العمر كانت هي رئيسة الخدمة تما، سولاتها اشنو حب الخاطر، قالت ليها أنا وردية بنية مرضية جيت نخدم عندكم بلا فلوس بلا هدية، وافقات المرأة ودخلتها.

وردية ملي دخلت تصدمت في الدار من لداخل، دايرة كيف القصر بالأثات او خدم و الحشم لي فيها، او جلست خدامة داك النهار او ملي سلاو شغل، قالت المرأة لوردية زيدي دخلي الحمام ندوشو، او هما كيدوشو وردية هزات طاصة لي عطاتها المرأة العمياء كتخوي بيها الماء، غير شافتها المرأة الكبيرة طلبتها تعطيها ليها وافقات وردية لكن قالت ليها بشرط تخليني هذ ليلة ندخل عند الأمير، الخدامة وافقات على هذ الشرط او في اليل قدمت الامير العشاء او دارت ليه المنوم في أتاي، الأمير غير تعشا و شرب أتاي نعس و ملي خدامة تأكدات بلي نعس دخلات عندو وردية.

وردية غير دخلات طاحت على فراش الأمير تبكي و تشكي، وحكات الأمير كاع قصتها من نهار لي مشا او خلاها، ولكن امير ناعس مجايب الدنيا خبار، او ملي خدامة حست بلي قرب يفيق قالت الوردية تخرج من عندو او هي معرفاش علاش مكانش كيجوبها، او نهار لاخر وردية جبدات المشطة لي عطاتها المرأة العرجاء تمشط بيها شعرها، غير شافتها الخدامة قالت ليها والو تعطيها ليا، وافقات وردية تعطيها ليها لكن قالت ليها تخليني تاني ندخل عند الأمير قالت ليها وخا، او عاودات الخدمة نفس الحيلة دارت المنوم في اتاي ديال الأمير او قدمتو ليه مع العشاء، لأمير غير شرب أتاي نعس في البلاصة او دخلات عندو وردية او بحال ليلا لي فاتت وردية بقا تبكي او تشكي ولكن لا حياة لمن تنادي، سيد ناعس محسش بيها كاع او خرجاتها الخدمة كيف العادة، او نهار لاخر وردية كانت كتقاد في حويجها او هي تشوف الخدامة عندها داك الفروج و ولادو قالت ليها عطيه ليا وافقات ولكن قالت ليها تعاودي دخلني عند الأمير او داكشي لي كان.

هذ المرة الأمير جا عندو قبل العشاء واحد جارو، او هما جالسين جابت ليه الخدامة العشاء ديالو مع داتك أتاي لي فيه المنوم، او قبل ميبدأ يتعشا سولو جارو على المرأة لي كتبكي عليه كل ليلة، الأمير ستغرب او قال ليه اش من مرأة هدشي ما كاينش، قاليه الجار راه دابة يومين متابعة كل ليلة كنسمعو بلي عندك شي مرأة في بيتك كتبكي أو تهضر بصوت عالي، او كمل الجار ملي نت مفراسك والو هانت متاكل والو من هذ العشاء او حتى أتاي متشربوش او غادي تشوف، او داكشي لي دار الأمير بعدما مشا الجار خزن العشا على الخدمة او دار راسو ناعس او ملي تأكدات بلي نعس دخلات عندو وردية.

وردية غير دخلت كيف العادة طاحت على فراش الأمير او جلست تبكي وتشكي وتحكي لو قصتها من نهار مشا عليها، الأمير ملي سلات القصة ديالها ضار عندها او شافها و عنقها و عرف هي مراتو او بلي راه صادقة في حبها ليه او هو يسمح ليها، لكن الأمير هذ المرة قاليها غادي نصارحك بي الحقيقتي، أنا بصح أمير ولكن ديال الجن انا شفتك بغيتك ديال بصح او نويت معاك زواج او دابة نتي قرري واش تكملي معايا ولا تحبسي.

وردية فكرت مزيان او هدشي كامل دارتو غير باش تكون مع رجلها او هي كتبغيه بزاف، قررت تكمل حياتها مع رجلها او جابت عندها كاع عائلتها تعيش معاها إلا خوتها لي كانو هما سببها في عذبها، أو مشات خبيرتي من واد لواد و بقيت انا مع الناس لجواد.

شكرا لكم أصدقائي على حسن متابعتكم لصفحتنا، سلام.

‫0 تعليق

اترك تعليقاً